MAKA İLƏ AZMİU ARASINDA ƏMƏKDAŞLIQ MÜQAVİLƏSİ İMZALANIB

05 aprel 2023-cü il tarixdə Milli Aerokosmik Agentliyinin baş direktoru Natiq Cavadovun rəhbərlik etdiyi nümayəndə heyəti AzMİU-da olub. 

Qonaqları görüşdə AzMİU-nun rektoru professor Gülçöhrə Məmmədova qarşılayaraq universitet haqqında geniş məlumat verdi. Rektor qonaqlara AzMİU-nun tədris istiqamətləri, mütəxəssis hazırlığı, elmi-tədqiqat sahələri, eləcə də kadr potensialı haqqında danışıb. 

Professor Gülçöhrə Məmmədova əlavə edib ki, AzMİU üçün istehsalat müəssisələri ilə əməkdaşlıq çox vacibdir və bu istiqamətdə son illər uğurlu əlaqələr qurulub. Milli Aerokosmik Agentliyi ilə əməkdaşlığın da uğurlu olacağına əminliyini ifadə edən rektor qeyd edib ki, AzMİU-nun kadr potensialının gücündən istifadə edərək ölkəmiz üçün aerokosmik sahədə bir sıra mühüm tədqiqatların aparılması mümkündür. 

Agentliyin baş direktoru Natiq Cavadov bildirib ki, qurum AzMİU ilə yeni qurulan əməkdaşlıqdan çox məmnundur. Agentlikdə mühüm vəzifələrdə çalışan AzMİU məzunlarına diqqət çəkən baş direktor universitetin tələbə və məzunları ilə yanaşı, müəllimləri ilə də əməkdaşlıqda maraqlı olduqlarını vurğulayıb. 

Görüş zamanı əməkdaşlıq predmenti olan bir sıra sahələr haqqında, o cümlədən birlikdə elektron xəritələrin hazırlanması, kosmik texnologiyalarla ekoloji problemlərin tədqiqi və ölkəmizin faydalı ehtiyatlarının öyrənilməsi məsələləri mütəxəssislərin iştirakı ilə ətraflı şəkildə müzakirə olunub. Qərara alınıb ki, qarşılıqlı əməkdaşlıqda elmi-tədqiqat məsələlərinə xüsusi diqqət yetirilsin.

Daha sonra, Milli Aerokosmik Agentlik ilə Azərbaycan Memarlıq və İnşaat Universiteti (AzMİU) arasında əməkdaşlıq müqaviləsi imzalanıb. Müqaviləni Milli Aerokosmik Agentliyinin baş direktoru professor Natiq Cavadov və AzMİU-nun rektoru professor Gülçöhrə Məmmədova imzalayıblar.