MİLLİ AEROKOSMİK AGENTLİYİNDƏ XALQ YAZIÇISI ANARLA GÖRÜŞ

26 may 2023-cü il tarixində Azərbaycan dövlətinin memarı və qurucusu Ümummilli Lider Heydər Əliyevin 100 illik yubileyi münasibətilə Milli Aerokosmik  Agentliyində tədbir keçirilmişdir. Tədbirin fəxri qonağı Azərbaycan Yazıçılar Birliyinin sədri, Xalq yazıçısı Anar olmuşdur.

Tədbiri giriş sözü ilə açan MAKA-nın baş direktoru, professor Natiq Cavadov Xalq yazıçısı Anarı salamlayaraq, dəvəti qəbul etdiyi üçün kollektiv adından təşəkkürünü bildirmişdir.

Sonra isə tədbirin aparıcısı yazıçının həyat və yaradıcılığı barədə məlumat verərək bildirdi ki, XX əsr Azərbaycan ədəbiyyatının tanınmış simalarından olan Xalq şairi Rəsul Rza və Nigar Rəfibəylinin ailəsində doğulub, boya başa çatmış Anar Azərbaycan ədəbiyyatının inkişafında öz dəsti xətti olan görkəmli yazıçı və dəyərli ziyalıdır. 

Görüşdə çıxış edən Xalq yazıçısı Anar agentliyin rəhbərliyinə və iştirakçılarına təşəkkür edərək, öz çıxışında Ümummilli Lider Heydər Əliyevin ədəbiyyata olan sevgisindən geniş söz açmışdır. Ümummilli Lider Heydər Əliyev ədəbiyyatı sevməklə bərabər, yazıçıları qoruyur, onlara xüsusi münasibət bəsləyirdi.

Xalq yazıçısı görüş iştirakçılarının suallarını cavablandıraraq, onlarla xatirə şəkili çəkdirdi.

Sonda agentliyin baş direktoru, professor Natiq Cavadov kollektiv adından xalq yazıçısı Anara yaradıcılıq uğurları arzulayıb və xatirə hədiyyəsi təqdim etmişdir.